धरान–१ गीता मन्दिरमा सनातन धर्म सेवा समिति सुनसरीको आयोजनामा ’महर्षि वेदव्यास जयन्ती तथा गुरुपूर्णिमा विशेष समारोह’

धरान । देशभर श्रद्धा र भक्तिपूर्वक गुरुपूर्णिमा पर्व मनाइएका अवसरमा धरान–१ स्थित ऐतिहासिक गीता मन्दिरको सभाहलमा सनातन धर्म सेवा समिति सुनसरीको आयोजनामा ’महर्षि वेदव्यास जयन्ती तथा गुरुपूर्णिमा विशेष समारोह’ भव्य रूपमा सम्पन्न भएको छ ।

दीप प्रज्ज्वलन तथा श्रीमद्भगवद्गीताको सामूहिक पाठबाट शुभारम्भ गरिएको कार्यक्रममा सनातन धर्मका विद्वान्, शिक्षाप्रेमी, धार्मिक अगुवा तथा सर्वसाधारण भक्तजनहरूको उल्लेखनीय सहभागिता रहेको थियो । समारोहमा गुरु परम्पराको महत्व, महर्षि वेदव्यासको अतुलनीय योगदान तथा वैदिक दर्शनको समकालीन सान्दर्भिकतामाथि विस्तृत चर्चा गरिएको थियो ।
सनातन धर्मका प्रखर ज्ञाता तथा वरिष्ठ शिक्षाप्रेमी प्रा. डा. आनन्द आचार्यले गुरु परम्परा कुनै व्यक्तिको पूजा वा सम्मानमा मात्र सीमित नभई ज्ञान, विवेक र संस्कारको निरन्तर प्रवाह भएको बताए । उहाँले महर्षि वेदव्यासले चार वेदको विभाजन, अठार पुराणको सम्पादन तथा महाभारतजस्तो महान् ग्रन्थको रचना गरी सम्पूर्ण मानव सभ्यतालाई अमूल्य बौद्धिक सम्पदा प्रदान गरेको उल्लेख गर्नुभयो । उहाँले भगवान भन्दा माथिल्लो दर्जामा गुरु रहने भएकोले गुरुलाई सम्मान गर्नुपर्नेमा जोड दिए ।

सो अवसरमा उहाँले आधुनिक सूचना–प्रविधिको युगमा युवा पुस्तामा नैतिक शिक्षा, संस्कार र पूर्वीय दर्शनप्रतिको चेतना अभिवृद्धि गर्नु आजको प्रमुख आवश्यकता भएको बताउँदै व्यास जयन्तीको मूल सन्देश पनि यही रहेको स्पष्ट पार्नुभयो । ज्ञान र संस्कारविनाको शिक्षा अपूर्ण हुने धारणा व्यक्त गर्दै उहाँले समाजलाई सही दिशातर्फ डो¥याउन गुरु परम्पराको निरन्तरता अपरिहार्य रहेको बताए ।
युवा पुस्तामा कुलधर्म, स्वधर्म तथा गुरुहरूप्रतिको श्रद्धाभाव विकास गर्ने उद्देश्यले व्यास जयन्ती कार्यक्रम आयोजना गरिएको जानकारी अन्य धर्म गुरुहरुले बताएका थिए । उनीहरुले गुरुपूर्णिमा गुरुजनप्रति सम्मान, कृतज्ञता र श्रद्धा व्यक्त गर्ने वैदिक संस्कृतिको अनुपम पर्व भएको बताउदै पारिवारिक तथा सामाजिक जीवनमा आध्यात्मिक ज्ञान र गुरुको मार्गदर्शनले नै शान्ति, सद्भाव र नैतिक मूल्य स्थापित हुने धारणा राखेक थिए । उनीहरुले धार्मिक ग्रन्थहरुमा समेत गुरुको विषयमा बर्णन गरेको उल्लेख गरेका थिए ।

समारोहमा भजन–कीर्तन, गुरु वन्दना, वैदिक मन्त्रोच्चारण तथा धार्मिक सांस्कृतिक प्रस्तुति गरिएको थियो। कार्यक्रमको समापनमा सहभागी भक्तजनहरूलाई प्रसादी वितरण गरिएको आयोजकले जनाएको छ । गुरु पूर्णिमाले गुरु–शिष्यबीचको सम्बन्धलाई अझ सुदृढ बनाउनुका साथै ज्ञान, अनुशासन, नैतिकता र आध्यात्मिक मूल्यहरूको संरक्षण तथा प्रवद्र्धन गर्न प्रेरणा दिने विश्वास गरिएको थियो । सो अवसरमा सनातन धर्मको विस्तारमा योगदान पु¥याएको भन्दै लोकनाथ सुवेदीलाई सम्मान समेत गरिएको थियो ।