राजविराज नगर क्षेत्रका स्थानीयवासीले ७० वर्षदेखि आफूहरू जग्गाको स्वामित्व प्रमाणपत्र (लालपूर्जा) बाट वञ्चित भएको भन्दै आन्दोलन

राजविराज । सप्तरीको राजविराज नगर क्षेत्रका स्थानीयवासीले ७० वर्षदेखि आफूहरू जग्गाको स्वामित्व प्रमाणपत्र (लालपूर्जा) बाट वञ्चित भएको भन्दै आन्दोलन थालेका छन्। लालपूर्जा उपलब्ध गराउन माग गर्दै स्थानीयले बजार बन्द गराउनुका साथै अर्धनग्न जुलुस प्रदर्शन गरेका छन्।
वर्षौंदेखि आफूहरूले भोगचलन गर्दै आएको जग्गाको स्वामित्व नपाउँदा बैंकिङ कारोबार, घर निर्माण, बेचबिखन तथा अन्य प्रशासनिक काममा समस्या भोग्नु परेको आन्दोलनकारीको भनाइ छ।
राजविराजका विभिन्न टोलका बासिन्दाले सरकारले पटक–पटक समस्या समाधान गर्ने आश्वासन दिए पनि कार्यान्वयन नगरेको आरोप लगाएका छन्। उनीहरूले लालपूर्जा नपाएसम्म आन्दोलनलाई निरन्तरता दिने चेतावनी दिएका छन्।
प्रदर्शनका क्रममा स्थानीयले नाराबाजी गर्दै सम्बन्धित निकायलाई तत्काल समस्या समाधान गर्न माग गरेका थिए। बजार बन्दका कारण राजविराजको जनजीवन केही समय प्रभावित बनेको थियो।
स्थानीयका अनुसार पुर्खौंदेखि बसोबास गर्दै आएको जमिनको प्रमाण नहुँदा उनीहरू राज्यबाट पाउने धेरै सेवा सुविधाबाट समेत पछाडि परेको महसुस गरिरहेका छन्।
आन्दोलनकारीले सरकारले तत्काल छानबिन गरी वास्तविक जग्गाधनीलाई लालपूर्जा वितरण गर्ने प्रक्रिया अगाडि बढाउनुपर्ने माग गरेका छन्।