साउनको सोमबार सप्तकोशीबाट जल ल्याएर पिण्डेश्वर मन्दिरमा चढाउँदा मनोकांक्षा पूरा हुने जनविश्वास

धरान ।श्रावण महिनासँगै सुनसरीको धरानमा बोलबम यात्रा सुरु भएको छ । सोमबार बिहानदेखि धरानका विभिन्न स्थानका शिवभक्तहरू गेरु वस्त्र धारण गरी बोलबम भन्र्दै धार्मिक यात्रामा सहभागी भएका हुन् । पहिलो सोमबार नै भक्तजनहरुकोे पिण्डेश्वर मन्दिरमा भक्तजनहरुको उपस्थिति देखिएको छ । पवित्र जल बोकेर शिवालयहरूमा पुगेर भगवान् शिवलाई जलाभिषेक गर्ने परम्पराअनुसार सप्तकोशीबाट जल ल्याएर चढाउनेको संख्या पहिलो हप्ता नै अधिक पाइएको हो ।

हिन्दू धर्ममा श्रावण महिना भगवान् शिवको आराधनाका लागि विशेष पवित्र मानिन्छ । यस अवधिमा गरिने बोलबम यात्रा श्रद्धा, भक्ति, संयम र समर्पणको प्रतीकका रूपमा लिइन्छ । धार्मिक विश्वासअनुसार पवित्र जल अर्पण गरी भगवान् शिवको पूजा–आराधना गर्दा मनोकामना पूरा हुने, दुःख–कष्ट हट्ने तथा सुख, शान्ति र समृद्धि प्राप्त हुने जनविश्वास रहेको छ ।
बोलबममा आउने भक्तजनहरु सबै उमेर समूहका रहेका छन् । बालबालिकादेखि बृद्धसम्म सप्तकोशीबाटै पानी ल्याएर जल चढाउनेको भक्तजहरुको संख्यामा समेत बृद्धि भएको पाइएको छ ।
यहाँ आउने सबै भक्तजन आस्थावान देखिन्छन् । साउनको सोमबार सप्तकोशीबाट जल ल्याएर पिण्डेश्वर मन्दिरमा चढाउँदा मनोकांक्षा पूरा हुने जनविश्वास रहेकै कारण भक्तजनहरुको उल्लेख्य उपस्थिति रहेको पाइएको छ । इटहरीबाट चतराहुदै धरानको पिण्डेश्वर जल चढाउन आउनु भएकी सरस्वती फुयालले यो पहिलो पटक नभएर आफूले थाहा पाएदेखि नै कोशीको जल पिण्डेश्वर मन्दिरमा चढाउने गरेको बताए । उनले धार्मिक मान्यतालाई अहिलेको युवा पुस्ताले भुल्नु नहुने बताए ।

त्यसो त बर्षेनी बोलबम भक्तजनहरुको संख्या बढ्दै जाँदा पिण्डेश्वर बाबाधाम समिति तथा मन्दिर व्यवस्थापन समितिले भक्तजनहरुलाई सहज वातावरण तयार पारिदिने काम गरेको छ । शान्ति सुरक्षा, प्राथमिक स्वास्थ्य उपचार, स्वयम्सेवक, निःशुल्क भोजनको व्यवस्था, शान्ति सुरक्षालाई मजबुत बनाउन विजुलीको लाइन गएको बेला पनि जेनेटरको व्यवस्था गरिएको पिण्डेश्वर बाबाधाम समितिका कोषाध्यक्ष पंकज घिमिरेले जानकारी दिए । उनले भक्तजनको सुविधालाई मध्यनजर गरी समितिले विभिन्न संघ संस्था, सुरक्षा निकायलगायतसँग समन्वय गरेर काम गरिरहेको बताए ।

यता मन्दिरका मूल पुजारी विनोद पोख्रेलले अयिहले बृहस्पति अस्त भएको समय मन्दिर जान नहुने भन्ने भ्रामक सन्देस फैलिएको हुनाले भक्तजनहरुको उपस्थिति केही कम भएको जानकारी दिए । उनले पूजा सम्बन्धी व्यवस्थापनमा मन्दिरले भक्तजनहरुलाई सहज वातावरण तयार गरिदिएको पनि बताए ।

धरानमा बोलबम यात्राको आकर्षण वर्षेनी बढ्दै गएको पाइएको छ । यात्राका क्रममा विभिन्न स्थानमा स्थानीय संघ–संस्थाले खानेपानी, स्वास्थ्य सहायता तथा विश्रामको व्यवस्था गरेका छन् । बोलबम यात्रालाई सुरक्षित र व्यवस्थित बनाउन नेपाल प्रहरी, सशस्त्र प्रहरी, स्थानीय तह तथा स्वयंसेवकहरू परिचालन गरिएको छ। भीड व्यवस्थापन, ट्राफिक सञ्चालन र आपत्कालीन स्वास्थ्य सेवाका लागि आवश्यक तयारी पूरा गरिएको समितिले जनाएको छ ।
धरानका धार्मिक अगुवाहरूका अनुसार बोलबम यात्रा केवल धार्मिक अनुष्ठान मात्र नभई आपसी सद्भाव, अनुशासन, सेवा र सामाजिक एकताको सन्देश फैलाउने अवसर पनि हो । श्रावण महिनाभर सञ्चालन हुने यस यात्राले धार्मिक पर्यटन प्रवद्र्धनसँगै स्थानीय आर्थिक गतिविधिमा समेत सकारात्मक प्रभाव पार्ने अपेक्षा गरिएको छ ।