धरान । हिन्दु धर्मावलम्बीहरूको महान् पर्व बडादशैंअन्तर्गत नवरात्रिको पहिलो दिन घटस्थापनासँगै धरानमा सार्वजनिक दुर्गा पूजाको रौनक सुरु भएको छ । ऐतिहासिक दन्तकाली शक्तिपीठदेखि पुरानो बजार, लक्ष्मी सडक, आचार्य लाइन र रेल्वेसम्म विभिन्न स्थानमा घटस्थापना, कलश स्थापना तथा दुर्गा पूजाका लागि आकर्षक मण्डप निर्माण गरी धार्मिक अनुष्ठान सुरु गरिएको छ ।
धरान–१४ विजयपुरस्थित दन्तकाली मन्दिरमा नेपाल पञ्चाङ्ग निर्णायक विकास समितिले निर्धारण गरेको शुभ साइतअनुसार बिहान ११ बजेर ४७ मिनेटमा घटस्थापना गरी जमरा राखिएको छ । यस्तै, धरानका विभिन्न बस्ती र व्यापारिक केन्द्रमा सार्वजनिक दुर्गा पूजाका लागि मूर्ति स्थापना, पण्डाल निर्माण तथा दैनिक पूजापाठको तयारी पूरा गरिएको छ ।
नेपालका चार प्रमुख शक्तिपीठमध्ये पूर्वको प्रमुख शक्तिपीठका रूपमा परिचित दन्तकाली मन्दिरमा घटस्थापनाका दिन बिहानैदेखि श्रद्धालुको चहलपहल बढेको थियो । सतीदेवीको दाँत पतन भएको पवित्र स्थलका रूपमा धार्मिक मान्यता रहेको यस मन्दिरमा नवरात्रभरि विशेष पूजाआराधना गरिन्छ । दन्तकाली मन्दिरका मूल पूजारी कमल भट्टराईका अनुसार घटस्थापनाको साइतबारे विभिन्न माध्यमबाट अन्योलपूर्ण चर्चा भए पनि पञ्चाङ्ग समितिले निर्धारण गरेको समयमै मन्दिरमा विधिपूर्वक पूजा सम्पन्न गरी जमरा राखिएको हो ।
उहाँले नवरात्रको पहिलो दिनदेखि सुरु हुने अनुष्ठानमा जमरा भगवतीको प्रसादका रूपमा ग्रहण गरिने बताउनुभयो । मन्दिरमा नित्य र नैमित्तिक गरी दुई प्रकारका पूजा हुने उल्लेख गर्दै उहाँले प्रतिपदादेखि पञ्चमीसम्म नियमित पूजा, षष्ठीमा बेल निमन्त्रणा, सप्तमीमा नवपत्रिका प्रवेश, अष्टमीमा कालरात्रि पूजा र नवमीमा महिषासुरमर्दिनी पूजा गरिने जानकारी दिनुभयो । दशमीका दिन जय, विजय र अपराजिताको पूजा गरी नवरात्रको अनुष्ठान सम्पन्न गरिने उहाँको भनाइ छ ।
परम्परागत शक्तिपीठमा धार्मिक विधिअनुसार पूजा चलिरहँदा धरानका विभिन्न टोलमा पनि सार्वजनिक दुर्गा पूजाको उत्साह देखिएको छ । धरान–२ मा स्थानीय भक्तजन, महिला तथा युवाको सहभागितामा कलश यात्रा निकालिएको छ । कलश यात्रापछि मण्डपमा कलश स्थापना गरी दैनिक पूजाआराधना सुरु गरिएको दुर्गा पूजा व्यवस्थापनमा सक्रिय चन्दन चौधरीले बताउनुभयो ।
यस वर्ष धरान–३ स्थित चिनियाँ चोक तथा पुरानो बजार क्षेत्रमा सार्वजनिक दुर्गा पूजाको विशेष आकर्षण देखिने भएको छ । विगतका वर्षमा भागवत रोडमा आयोजना हुँदै आएको सार्वजनिक नवदुर्गा पूजा यसपटक ठाउँको अभाव भएपछि पुरानो बजारस्थित गणेश भण्डार परिसरमा सारिएको हो । सार्वजनिक दुर्गा पूजा समारोहकी संयोजक ममता पौड्यालका अनुसार भागवत रोडमा घर तथा भवन निर्माण बढ्दै गएपछि पूजा सञ्चालनका लागि पर्याप्त खुला ठाउँ अभाव भएको थियो । त्यसपछि गणेश भण्डारका सञ्चालकले उपलब्ध गराएको स्थानमा आकर्षक पण्डाल निर्माण गरी दुर्गा पूजा आयोजना गरिएको उहाँले बताउनुभयो ।
पूजा स्थलमा दुर्गालगायत देवीदेवताका मूर्ति स्थापना गरी भक्तजनका लागि पूजाआराधना गर्ने व्यवस्था मिलाइएको छ । मूर्ति निर्माण, पण्डाल तथा अन्य व्यवस्थापनसहित यस वर्षको पूजामा करिब सात लाख रुपैयाँ खर्च हुने अनुमान गरिएको संयोजक पौड्यालले जानकारी दिनुभयो । उहाँका अनुसार स्थानीयवासी, व्यवसायी तथा शुभेच्छुकको सहयोगबाट पूजा सञ्चालन भइरहेको छ । धरान–१ स्थित लक्ष्मी सडकमा पनि स्थानीय व्यवसायी तथा समाजसेवी सीताराम आचार्यको संयोजनमा दुर्गा पूजाका लागि विशेष व्यवस्था गरिएको छ । व्यापारिक क्षेत्रलाई झिलिमिली बत्ती र आकर्षक सजावटले सिँगार्दै धार्मिक वातावरण निर्माण गरिएको छ । त्यसैगरी, धरान–९ को आचार्य लाइनमा दिनेश चौधरीको संयोजनमा स्थानीयवासीको सहभागितामा दुर्गा पूजा समारोह समिति गठन गरी दैनिक सन्ध्या आरती तथा भजनकीर्तनको व्यवस्था मिलाइएको छ । धरान–१७ रेल्वे क्षेत्रमा पनि स्थानीय दुर्गा पूजा समितिको अगुवाइमा दुर्गा मूर्ति स्थापना गरी नवरात्रभरि नियमित पूजाआराधना गर्ने तयारी गरिएको छ । धरानमा सार्वजनिक दुर्गा पूजाको विस्तार धार्मिक आस्थासँगै सामाजिक सद्भाव र सांस्कृतिक सहकार्यको उदाहरणका रूपमा देखिँदै आएको छ । बहुजातीय, बहुभाषिक तथा बहुसांस्कृतिक पहिचान बोकेको धरानमा विभिन्न समुदायको सहभागिताले यस पर्वलाई थप विशेष बनाएको छ ।
धरान–१४ विजयपुरस्थित दन्तकाली मन्दिरमा नेपाल पञ्चाङ्ग निर्णायक विकास समितिले निर्धारण गरेको शुभ साइतअनुसार बिहान ११ बजेर ४७ मिनेटमा घटस्थापना गरी जमरा राखिएको छ । यस्तै, धरानका विभिन्न बस्ती र व्यापारिक केन्द्रमा सार्वजनिक दुर्गा पूजाका लागि मूर्ति स्थापना, पण्डाल निर्माण तथा दैनिक पूजापाठको तयारी पूरा गरिएको छ ।
नेपालका चार प्रमुख शक्तिपीठमध्ये पूर्वको प्रमुख शक्तिपीठका रूपमा परिचित दन्तकाली मन्दिरमा घटस्थापनाका दिन बिहानैदेखि श्रद्धालुको चहलपहल बढेको थियो । सतीदेवीको दाँत पतन भएको पवित्र स्थलका रूपमा धार्मिक मान्यता रहेको यस मन्दिरमा नवरात्रभरि विशेष पूजाआराधना गरिन्छ । दन्तकाली मन्दिरका मूल पूजारी कमल भट्टराईका अनुसार घटस्थापनाको साइतबारे विभिन्न माध्यमबाट अन्योलपूर्ण चर्चा भए पनि पञ्चाङ्ग समितिले निर्धारण गरेको समयमै मन्दिरमा विधिपूर्वक पूजा सम्पन्न गरी जमरा राखिएको हो ।
उहाँले नवरात्रको पहिलो दिनदेखि सुरु हुने अनुष्ठानमा जमरा भगवतीको प्रसादका रूपमा ग्रहण गरिने बताउनुभयो । मन्दिरमा नित्य र नैमित्तिक गरी दुई प्रकारका पूजा हुने उल्लेख गर्दै उहाँले प्रतिपदादेखि पञ्चमीसम्म नियमित पूजा, षष्ठीमा बेल निमन्त्रणा, सप्तमीमा नवपत्रिका प्रवेश, अष्टमीमा कालरात्रि पूजा र नवमीमा महिषासुरमर्दिनी पूजा गरिने जानकारी दिनुभयो । दशमीका दिन जय, विजय र अपराजिताको पूजा गरी नवरात्रको अनुष्ठान सम्पन्न गरिने उहाँको भनाइ छ ।
परम्परागत शक्तिपीठमा धार्मिक विधिअनुसार पूजा चलिरहँदा धरानका विभिन्न टोलमा पनि सार्वजनिक दुर्गा पूजाको उत्साह देखिएको छ । धरान–२ मा स्थानीय भक्तजन, महिला तथा युवाको सहभागितामा कलश यात्रा निकालिएको छ । कलश यात्रापछि मण्डपमा कलश स्थापना गरी दैनिक पूजाआराधना सुरु गरिएको दुर्गा पूजा व्यवस्थापनमा सक्रिय चन्दन चौधरीले बताउनुभयो ।
यस वर्ष धरान–३ स्थित चिनियाँ चोक तथा पुरानो बजार क्षेत्रमा सार्वजनिक दुर्गा पूजाको विशेष आकर्षण देखिने भएको छ । विगतका वर्षमा भागवत रोडमा आयोजना हुँदै आएको सार्वजनिक नवदुर्गा पूजा यसपटक ठाउँको अभाव भएपछि पुरानो बजारस्थित गणेश भण्डार परिसरमा सारिएको हो । सार्वजनिक दुर्गा पूजा समारोहकी संयोजक ममता पौड्यालका अनुसार भागवत रोडमा घर तथा भवन निर्माण बढ्दै गएपछि पूजा सञ्चालनका लागि पर्याप्त खुला ठाउँ अभाव भएको थियो । त्यसपछि गणेश भण्डारका सञ्चालकले उपलब्ध गराएको स्थानमा आकर्षक पण्डाल निर्माण गरी दुर्गा पूजा आयोजना गरिएको उहाँले बताउनुभयो ।
पूजा स्थलमा दुर्गालगायत देवीदेवताका मूर्ति स्थापना गरी भक्तजनका लागि पूजाआराधना गर्ने व्यवस्था मिलाइएको छ । मूर्ति निर्माण, पण्डाल तथा अन्य व्यवस्थापनसहित यस वर्षको पूजामा करिब सात लाख रुपैयाँ खर्च हुने अनुमान गरिएको संयोजक पौड्यालले जानकारी दिनुभयो । उहाँका अनुसार स्थानीयवासी, व्यवसायी तथा शुभेच्छुकको सहयोगबाट पूजा सञ्चालन भइरहेको छ । धरान–१ स्थित लक्ष्मी सडकमा पनि स्थानीय व्यवसायी तथा समाजसेवी सीताराम आचार्यको संयोजनमा दुर्गा पूजाका लागि विशेष व्यवस्था गरिएको छ । व्यापारिक क्षेत्रलाई झिलिमिली बत्ती र आकर्षक सजावटले सिँगार्दै धार्मिक वातावरण निर्माण गरिएको छ । त्यसैगरी, धरान–९ को आचार्य लाइनमा दिनेश चौधरीको संयोजनमा स्थानीयवासीको सहभागितामा दुर्गा पूजा समारोह समिति गठन गरी दैनिक सन्ध्या आरती तथा भजनकीर्तनको व्यवस्था मिलाइएको छ । धरान–१७ रेल्वे क्षेत्रमा पनि स्थानीय दुर्गा पूजा समितिको अगुवाइमा दुर्गा मूर्ति स्थापना गरी नवरात्रभरि नियमित पूजाआराधना गर्ने तयारी गरिएको छ । धरानमा सार्वजनिक दुर्गा पूजाको विस्तार धार्मिक आस्थासँगै सामाजिक सद्भाव र सांस्कृतिक सहकार्यको उदाहरणका रूपमा देखिँदै आएको छ । बहुजातीय, बहुभाषिक तथा बहुसांस्कृतिक पहिचान बोकेको धरानमा विभिन्न समुदायको सहभागिताले यस पर्वलाई थप विशेष बनाएको छ ।
प्रतिक्रियाहरू (0)
प्रतिक्रिया दिन कृपया लगइन गर्नुहोस्।