अत्याधुनिक मनोरञ्जनात्मक ‘फन पार्क’ अहिले पर्यटकहरूको मुख्य आकर्षण.....

धरान । कोशी प्रदेशकै प्रमुख पर्यटकीय स्थल साँगुरीगढी गाउँपालिकाको भेडेटार पर्यटकीय गन्तव्यको रुपमा विकास हुदै गएको छ । पछिल्लो समय भेडेटारमा रहेको भिस्टा लक्जरी रिसोर्ट एण्ड फन पार्कले समेत आन्तरिक तथा भारतीय पर्यटकहरूलाई लोभ्याउने गरेको छ । आधुनिक पूर्वाधार, साहसिक मनोरञ्जन र प्राकृतिक सौन्दर्यको संगम बनेको यस परियोजनाले कोशी प्रदेशको पर्यटन क्षेत्रमा नयाँ उत्साह थपेको छ ।

निर्माण गरिएको अत्याधुनिक मनोरञ्जनात्मक ‘फन पार्क’ अहिले पर्यटकहरूको मुख्य आकर्षण बनेको हो । कुहिरोले ढाकिएको मौसम र हिमाली दृश्यबीच फनपार्कले पर्यटकहरूलाई रोमाञ्चित बनाउने गरेको छ । बालबालिकाका लागि विभिन्न पिङ तथा साहसिक खेलहरू समेत सञ्चालनमा रहेकाले परिवारसहित पुग्ने पर्यटकहरूको संख्या बढ्दै गएको छ ।
पर्यटकहरु भेडेटारमा रहेका आकर्षक गन्तव्य स्थलमा रमाउने गर्छन् । तर अझ बढी आकर्षित भने उनीहरु त्यहा रहेको स्काई वाक र फन पार्कमा हुने गरेका छन् । उनीहरुले फन पार्कमा रहेका पिङ खेल्दा र स्काइवाकमा हिँड्दा डरसँगै रमाइलो हुने गरेको बताउँछन् ।

भिस्टा लक्जरी रिसोर्ट एण्ड फन पार्कका सञ्चालक राजन केसीले भेडेटारलाई अन्तर्राष्ट्रिय स्तरको मनोरञ्जनात्मक गन्तव्य बनाउने उद्देश्यले फन पार्क सञ्चालनमा ल्याइएको बताउनुभयो । उहाँले अहिले फन पार्कमा बालबालिका तथा युवायुवतीका साथै पारिवारिक वातावरणमा खेल्न सकिने तीनवटा पिङ निर्माण गरिएको बताउनुभयो ।

उहाँले भेडेटार सुन्दर पर्यटकीय स्थल भएकोले त्यसलाई अझ आकर्षक बनाउन आधुनिक मनोरञ्जनका संरचना थपेका थपेको बताउदै कोशी प्रदेशका साथै भारतको बिहार र पश्चिम बंगालबाट समेत पर्यटक आउने क्रम बढेर गएको बताउनुभयो ।
फन पार्कका अध्यक्ष गोपाल कटुवालले परियोजनामा सुरक्षालाई उच्च प्राथमिकता दिइएको बताउनुभयो । उहाँले संरचनाहरू अन्तर्राष्ट्रिय मापदण्डअनुसार सुरक्षित र मजबुत रहेको बताउदै निर्धक्क भएर मनोरञ्जन लिन सकिने बताउनुभयो ।

होटल एसोसिएसन भेडेटारका संस्थापक विष्णु श्रेष्ठले भिस्टा रिसोर्टको आगमनसँगै भेडेटारको पर्यटनले नयाँ गति लिएको बताउनुभयो । उहाँले यसले धरान, धनकुटा र आसपासका होटल तथा बजारलाई समेत चलायमान बनाएको बताउनुभयो ।

यो टिमले केही बर्ष अगाडि स्काईवाक सञ्चालनमा ल्याएको थियो भने भर्खरैमात्र फनपार्क सञ्चालनमा ल्याएको हो । स्काईवाक र फनपार्क सञ्चालनमा ल्याएपछि भने अझ भेडेटारको चहलपहल अझ बढेको छ ।
पर्यटकहरूको बढ्दो आकर्षण, निजी क्षेत्रको उत्साहजनक लगार्नीले भेडेटारलाई अब आधुनिक र व्यवस्थित पर्यटन गन्तव्यका रूपमा स्थापित गराउँदै लगेको छ । पर्यटन व्यवसायीहरूले आगामी दिनमा यस क्षेत्रलाई कोशी प्रदेशकै प्रमुख चिनारीका रूपमा विकास गर्ने अपेक्षा गरेका छन् ।